第一當然是上一篇文章所講身高高咗1吋，之前我一直是5呎8吋高中等身材，多咗1吋變成5呎9吋。我老豆、細佬都比我高，在中學時代，男仔當然想有6呎高，退而求其次也希望有5呎10吋。我已經不斷有打藍球、游水，但最後也只得5呎8吋，唔夠高大威猛😭。現在居然中年再度發育變了5呎9吋，雖然再高1吋的可能性微乎其微，但叫做實現咗一半心願😅。
第二有改善的當然是身型，由細到大都係藤條身型，食極都唔肥，又唔長肉。但30歲之後因為坐辦公室多，就開始有肚腩，無論幾瘦130磅或最肥的時候有170幾磅，都肚腩不離身。試過好多不同的減肥方法、食譜、運動（跑步、健身、瑜珈、功夫等），就算減到好瘦，但肚腩都係到。另外男人都想練大隻啲，外型吸引啲，著衫都好睇啲，但我健了身差不多10年，當然不是很勤力，無論是自學、搵教練、上 course ，又增磅、又減磅，出嚟效果也是不太滿意，可能我搵個啲唔夠貴🙄（實情係我骨格唔夠精奇🤣）。不過最大問題也是舊患，健身好多時都想谷多啲，舉重啲就出事，受傷之後停幾個星期至幾個月不等，再練返又從頭嚟過。但估唔到練 Calisthenics 只係半年到就減咗個肚腩，雖然還有些 love handle 但已經非常滿意。還有全身肌肉明顯多咗，Calisthenics 唔同舉重會舉到肌肉一舊舊，而係整體平均大隻。有好多玩 Calisthenics 嘅人唔除衫都唔知咁大隻。比起舉重的笨拙身形，現在的增長正正是我多年夢寐以求。希望再過一年，肌肉增加會更加明顯，而家身形是我一世人之中最 fit 的。
以上兩點都是在外型上的改善，但最驚喜的副作用居然是我把廿多年身體上累積的舊患醫好了八九成，只剩下右膝頭哥正在努力中，其餘所有筋骨、肌肉痛症全部醫好咗九成，不會再時不時隱隱作痛，好像重生了另一個人😙。
我由開始做嘢坐辦公室，年輕時當然冇留意，但原來慢慢就累積咗好多勞損，只是30多歲就有以下問題：
- 第一右手碗、手指尾、手踭用得老鼠多就開始發炎、關節痛。之後翻風落雨都會痛；
- 更嚴重整整下就有埋五十肩，整個右手臂都提不起上來，就算好返，手臂提起到某位置就開始痛，好唔順手；
- 再來是右頸肌肉繃緊，嚴重時頭轉都轉唔到；
- 坐得多，姿勢又唔好，最後更發展成椎間盤突出，一唔小心攞重嘢就會整到，之後幾日至幾星期條腰硬哂呔；
- 還有最大鑊是大仔出世，但唔識抱BB，條腰就埋一邊，長期扯緊，有一次攞重嘢，拉傷了右後下腰肌肉。不過因為冇好好護理，而且BB都要繼續抱，有次只是踎低就撕裂了右後下腰肌肉。繼續就住就住，最後連左後下腰肌肉也撕裂了。那一次就手尾長，差不多一個多星期臥床完全唔郁得，之後帶咗腰封好耐，從此腰痛就一直困擾咗我廿幾年。
期間無論是什麼醫生，只要有人推薦都會去睇下；西醫、中醫、跌打、運動創傷治療、針灸、推拿、脊醫、物理治療等，基本上噏得出的都去睇過。結果是治標不治本，錢就比咗，但有很多更是連標也治不到。通常睇完醫生的時候條腰可能鬆一下，但之後好快又繃緊返。這樣的狀態維持了最少兩三年，大大影響了生活，但怎樣醫也是醫不好。老人家時時警告年輕人要小心，唔好整親，唔係就手尾長。通常年輕都係唔聽，老咗先知道真係手尾長。我認識的人中，到了一定年紀，都冇咩邊個會冇問題，通常都係週身傷😓。
最後去了學瑜珈+Pilates，再睇書自學，每日忍住痛去做動作，終於練了大約一年，身體叫做回復返行動自如。但始終留下了舊患，翻風落雨，同一動作做得多，就週身唔舒服。還有如果一時姿勢唔好，好容易又拉傷。
不過故事仲未完，人就真係犯賤，郁到啲就想搵嘢學。十年前就學人去打 golf，以為是年紀大的運動，怎知原來打 golf 係十個打九個傷，最後結果係令到：
- 左手腕；
- 左手肘（哥爾夫球肘）；
- 上背部左、右圍繞琵琶骨的筋膜；
- 右胸鎖骨附近的筋膜；
- 左盤骨前神經也相繼受傷、發炎，最後又變成了更多舊患😭。
再加上遺傳性膝頭哥退化，我嘅全身基本上是冇一處是正常、健康。數一數原來最少有15處傷患，估唔到都未好老就搞成咁，咁點過下半世😓？
最開始幾篇訓練成果文章，都表明練 Calisthenics 會 trigger 到啲舊患，不過居然比我誤打誤撞，通過這運動找到了醫治舊患的方法。經過一年多，好多舊患也好了，做同一動作也不會再復發。由我有舊患開始，不斷找尋方法醫治，跟了我廿多年的舊患居然在一年多就醫好。就我所知好多醫治方法也只可以舒緩舊患，而且要長期接受治療，想完全根治是非常困難。
方法在最開始幾篇訓練成果也有一些模糊概念，主要是靠鍛鍊、拉伸加上用工具放鬆，經過不斷重複這三種動作，舊患就會越來越輕微，直到感覺不到。通常坊間好多醫治方法只包含了以上一、兩種動作，所以最後也是治標不治本。
過程當然非常辛苦，但最後可以醫治了舊患，下半世不用再被困擾，怎樣也是值得，這也可以說是在這次疫情中，最大的得著。
沒有留言:
發佈留言